Нұр-Сұлтанда «Бұрқасын-2021» қысқы фестивалі өтті
Аталған бәсеке қысқы спорттың 8 түрінен өтті. Нақтырақ айтқанда, шаңғы жарысы, гір тасын көтеру, қол күресі, пималы хоккей, қармен нысананы дәлдеп ату, автоспорт, мотоспорт және қысқы футбол.
Іс-шараға Нұр-Сұлтан қаласы әкімінің орынбасары Бақтияр Мәкен мен ҚР Мәдениет және спорт министрлігінің Спорт және дене шынықтыру істері комитетінің төрағасы Серік Сәпиев қатысып, спортшыларға сәттілік тіледі.
«Бұл «Бұрқасын-2021» қысқы фестивалі дәстүрлі түрде жыл сайын ұйымдастырылады. Көріп отырғанымыздай, сайысқа кішкентай баладан аға буынға дейін қатысып жатыр. Қысқы ойындарға қатысып, белсенділік танытып жатқан спортшыларға үлкен алғыс айтамыз. Біздің мақсатымыз – салауатты өмір салтын және спортты насихаттау. Баршаңызға сәттілік тілеймін», – деді Б.Мәкен.
Сонымен қатар, қысқы фестивальге қатысқан елорда тұрғындары мен спортсүйер қауымды Олимпиада чемпионы Серік Сәпиев Мәдениет және спорт министрлігінің атынан құттықтап, шараны ұйымдастырған Нұр-Сұлтан қаласының әкімдігіне алғыс білдірді.
Шаңғы жарысына 4 жастағы бүлдіршіннен 50 жасқа дейінгі спортшылар қатысты. Сондай-ақ осы спорт түрінен сайысқа түскен жас сарбаздар мен әскери қызметшілер салауатты өмір салтын ұстанып, үлгі көрсетті.
«Бұрқасын-2021» фестиваліне қатысқандағы мақсатымыз – жастар мен жасөспірімдерді спортпен айналысуға насихаттау, жастарға үлгі болу. Біз үшін қазіргі қоғамдағы жастардың денсаулығы маңызды. Сол себепті бос уақытын тиімді пайдалансын деген оймен «Жас сарбаз» қоғамдық бірлестігінің атынан 30-ға жуық жасөспірімді қатыстырып отырмыз. Жеңіске жетеміз деген үмітіміз бар», – деді «Жас сарбаз» жасөспірімдер әскери-патриоттық қозғалысы Нұр-Сұлтан қалалық филиалының төрағасы Асхат Налшыбек.