Нұр-Сұлтанда Ashyq жобасы үй карантинін бұзған 189 адамды анықтады
«Коронавирус инфекциясын тіркеудің жалғасуының негізгі себептері – тұрғындардың карантин шараларын сақтамауы, атап айтқанда адамдар көп жиналатын орындарға бару, маска тақпау және негізгі себептердің бірі амбулаториялық науқастардың да, жақын байланыста болған адамдардың да үй карантині режимін сақтамауы болып отыр», - деді С. Бейсенова елорда әкімдігінде өткен брифингіде.
Оның айтуынша, үй карантинінде отырған кей адамдар тыйым салынғанға қарамастан талапты бұзып жүр.
«Бұл олардың Ashyq жобасына қатысатын нысандарға баруымен расталып отыр. Сәуір айында ғана үй карантинін бұзушылардың 189-ы, оның ішінде 89 науқас және 100 байланыста болған адам анықталды», - деді Сархат Бейсенова.
Айта кетейік, елімізде Ashyq пилоттық жобасын қолдану арқылы театрлар мен караокелердің, банкет залдарының қайта жұмыс істеуіне рұқсат берілген. Елордада Ashyq жобасына енгізілген 91 кәсіпкерлік субъектісі «жасыл аймақ» талабы бойынша жұмыс істейді.