USD 435.1 EUR 493.27
RUB 5.69 CNY 68.63
Jańalyqtar

Нұр-Сұлтанда «Алматы – Тәуелсіздіктің алтын бесігі» көрмесі ашылды

2021 жылғы 23 қараша 14:20
Бөлісіңіз:
Нұр-Сұлтанда «Алматы – Тәуелсіздіктің алтын бесігі» көрмесі ашылды

НҰР-СҰЛТАН. ҚазАқпарат - Бүгін ҚР Тұңғыш Президенті – Елбасы кітапханасының музейінде Алматы қаласы әкімдігімен бірлесіп ұйымдастырылған «Елбасы елімен бірге» альбомының тұсаукесері және «Алматы – Тәуелсіздіктің алтын бесігі» көрмесі ашылды, деп хабарлайды ҚазАқпарат тілшісі.

Тәуелсіздіктің 30 жылдығына және Қазақстан Республикасының Тұңғыш Президенті күніне орайластырылған шара Елбасы кітапханасының «Қазақстан жолы» жобасының аясында өтті.

«Тәуелсіздік күні қарсаңында Тәуелсіздік бесігі – Алматы қаласына арналған көрмені ашуымыздың символдық мәні өте зор. Осыдан тура 30 жыл бұрын, 1991 жылғы желтоқсанда мемлекетіміз Егемендігінің негізін қалаған тарихи оқиғалар орын алды, 1 желтоқсанда бүкілхалықтық Президент сайлауы, 10 желтоқсанда Мемлекет басшысын ресми ұлықтау рәсімі өтті және 16 желтоқсанда Қазақстан Тәуелсіздігі ресми жарияланды», - деді Елбасы кітапханасының директоры Бақытжан Темірболат.

«Алматы – Тәуелсіздіктің алтын бесігі» көрмесінің негізгі мақсаты – Алматы қаласының архивтік құжаттарын, фотосуреттерді, мұрағаттар мен музейлер жинақтарын және Елбасы кітапханасының экспонаттарын көрсету арқылы Алматы қаласының Тәуелсіз Қазақстан тағдырындағы орны мен рөлін көрсету.

Алматы әкімі Бақытжан Сағынтаев ұсынылған экспозициялар мегаполистің Тәуелсіздіктің 30 жылындағы жетістіктеріне арналғанын атап өтті.

«Тәуелсіздік жылдарында Алматы экономикасы 1993 жылғы 2,1 млрд теңгеден 2020 жылы 13,5 трлн теңгеге дейін, ал жан басына шаққандағы ЖӨӨ 342,5 АҚШ долларынан 16,7 мың АҚШ долларына дейін өсті. Халық саны 1,8 есеге артты; 1991 жылғы 1 134 мың адамнан 2021 жылы 2 миллионнан астам адамға дейін. Тәуелсіз Қазақстан дамуының жаңа кезеңінде қала еліміздің ғылыми, білім беру, зияткерлік орталығы болып қала береді және біздің ұлтымыздың бірегейлігінің айқын көрінісі болып табылады», - деді Бақытжан Сағынтаев.

«Алматы – Тәуелсіздіктің алтын бесігі» көрмесі үш экспозициядан тұрады:

1. «Тәуелсіздіктің бастауы» - бұл 1986 жылғы Желтоқсан оқиғасы, 1991-1997 жылғы оқиғалар хроникасы, сондай-ақ Алматы қаласында қабылданған маңызды тарихи шешімдер.

2. «Қазақстандық жол: Алматының 30 жылдағы жетістіктері» – мегаполистің тәуелсіздік жылдарындағы әлеуметтік, экономикалық, мәдени салалардағы, сондай-ақ спорттағы негізгі жетістіктері туралы материалдарды көрсетеді. Көрермендерге интерактивті түрде қаланың әлемдік мәдениет пен өркениетке қосқан үлесі туралы Алматы қаласында 1991-2021 жылдары болған 30 маңызды оқиғамен танысу мүмкіндігі ұсынылды.

3. «Біздің болашағымыз: Алматы – 2050 Стратегиясы» - бөлімінде Алматының ұзақ мерзімді дамуының басты бағдарлары мен стратегиялық басымдықтары айшықталған: Алматы – шетсіз қала; «ақылды» қала; тең мүмкіндіктер қаласы; қауіпсіз қала; жасыл қала; жаһандық іскерлік орталық; мәдени, креативті қала.

Көрме Қазақстан Республикасының Тұңғыш Президенті – Елбасы кітапханасының музейінде 2022 жылғы 28 қаңтарға дейін жұмыс істейтін болады.


Біздің каналымызға жазылыңыз:

Бөлісіңіз:

Автор:

Алма Мұқанова

Сондай-ақ... оқыңыз
Пікір қалдыру
+7
Жіберу
ONLAIN QYZMETKERLER

MURAǴAT