Нұр-Сұлтанда 800-ден астам отбасы апатты үйден жаңа баспанаға көшіріледі

None
None
НҰР-СҰЛТАН. ҚазАқпарат - Нұр-Сұлтанда 800-ден астам отбасы апатты үйлерден жаңа баспанаға көшіріледі. Сонымен бірге 50-ден астам көппәтерлі тұрғын үйге жөндеу жұмыстары жүргізіледі, деп хабарлайды ҚазАқпарат.

Елорда әкімдігінен мәлім еткендей, апатты үйлердің кейбірі 90 жыл бұрын салынған.

Қала әкімі Алтай Көлгінов ескі үйлерді аралап, тұрғындармен әңгімелесті.

Сарыарқа ауданы, Бесшатыр көшесі, 8-үйдің тұрғындары былтырғы күзде елорда әкімімен кездескеннен кейін ауданда бірқатар мәселелер шешілгенін айтты. Асфальт төселіп, кәріз жүйесі қалпына келтірілді.

«Үй көз алдымызда бұзылып жатыр. Қыста көппәтерлі үйді көмірмен жылытамыз. Үй суық», - дейді тұрғындар.

«Қалада 125 апатты үй бар. Сіздің ауданда былтыр болып, осы жылы сүрілетін үйлердің қатарына қостық. Осы үйдің барлық отбасылары жаңа жылды жаңа баспанада қарсы алады. Биыл 800-ден астам отбасын жаңа үйлерге көшіреміз», - деді Алтай Көлгінов.

Алтынсарин көшесінде сүрілетін тағы бір үйдің салынғанын 90 жыл болған. Сондай-ақ, дәл жанына теміржолдар төселген барак типтес үйлер бұзылады. «Вагон рельстен шығып, үйімізге жақын жерге құлаған жағдайлар болды. Балаларды далаға жіберуге қорқамыз», - дейді тұрғындар.

Сонымен қатар, тұрғын үй-коммуналдық шаруашылығын жаңғырту бағдарламасы аясында елордада 50-ден астам көппәтерлі тұрғын үй кешені жөндеуден өтеді.

«Тұрғын үй салу — маңызды бағыттардың бірі. Егер 800-ден астам отбасы апатты үйлерден жаңа үйлерге көшетін болса, биыл кезекте тұрғандар үшін 8 мыңнан астам әлеуметтік пәтер салынады. Бірақ біраз жыл бұрын ғана салынған үйлер бойынша да сұрақтар бар. Олардың плиткалары құлап, фундаменттері отырып жатыр. Мысалы, «Инфинити», «Территория комфорта-2», «Орбита», «7 бочек» және тағы басқа тұрғын үй кешендері. Бұл үйлермен де айналысамыз. Мемлекет күрделі жөндеу жұмыстарын жүргізуге қаражат бөледі, содан кейін бұл қаражат тұрғындар арасында 15 жылға дейінгі мерзімге бөлінеді», - деді қала әкімі Алтай Көлгінов.


Соңғы жаңалықтар