Нұр-Сұлтанда 41 мектеп санитарлық талаптарды бұзған
«Нұр-Сұлтан қаласы Тауарлар мен көрсетілетін қызметтердің сапасы мен қауіпсіздігін бақылау департаменті жанынан білім беру ұйымдарында санитарлық талаптарды сақтау жөніндегі мобильді топтар құрылды. Оқу жылының басынан бері 105 мектеп – 89 мемлекеттік және 16 жекеменшік мектеп тексерілді. Оның ішінде 41 мектепте бұзушылықтар анықталды. Бір мектепке 230 АЕК (1 АЕК – 2 651 теңге) көлемінде айыппұл салынды. 37 балабақша тексерілді, оның 18-і мемлекеттік және 19-ы жеке меншік. 12 балабақшада талаптар бұзылып, үш балабақша бойынша әкімшілік шаралар қабылданды», - деді Шолпан Қадырова елорда әкімдігінде өткен онлайн брифингте.
Білім беру ұйымдары басшыларының жауапкершілігі бойынша да жұмыс жүргізілген. Материалдар комиссияның қарауында жатыр.
«Күн сайын білім беру ұйымдарының басшыларымен кездесулер өткіземіз. Әрине, санитарлық шараларды сақтау мәселелерін талқылаймыз», - дейді Ш. Қадырова.
Айта кетейік, оқу жылының басынан бері елордада 18 бала COVID-19 вирусын жұқтырды. Оның 14-і қашықтан оқыған, төртеуі – кезекші сынып оқушылары.