Nur-Sultan - NS туристік бренді жасалды - Алтай Көлгінов
«Қаладағы туризм саласы өте қарқынды дамып келеді. Соңғы 10 жылда туристер мен қонақ үйлер саны еселеп артты. Нұр-Сұлтан қаласындағы жаңа әуежай терминалының ашылуы жолаушылар ағынын 3,5 есеге көбейтуге мүмкіндік берді. Біздің әуежай жылына 8 млн туристі қабылдай алады», - деді әкім PATA Travel Mart 2019 Азия-Тынық мұхиты елдерінің халықаралық туристік көрмесінде.
Оның айтуынша, биыл елорда Mastercard компаниясының үздік 200 туристік бағыты рейтингіне енді.
«Нью-Йорк, Лос-Анджелес, Куала-Лумпур сынды жаһандық қалалардың тәжірибесін зерттеп, Nur-Sultan - NS туристік бренді жасалды. Президенттің тапсырмасымен биыл астанада Халықаралық туризм мен қонақжайлылық университеті ашылады», - деді А. Көлгінов.
Одан бөлек, елорданың туризмін дамытудың үш негізгі бағыты анықталған.
«Бірінші бағыт - оқиғалық, іс-шаралар туризмін дамыту, әлем чемпионаттарын көптеп ұйымдастыру. Мысалы, қазір Нұр-Сұлтанда күрестен әлем чемпионаты өтіп жатыр. Маусым айында Орталық Азияның Comic Con фестивалі өтті, оған 53 мың адам келді. Шілде айында дәстүрлі Ironman өткіздік. Екінші бағыт - медициналық туризм. Халықаралық сарапшылар Нұр-Сұлтанда медициналық туризмнің үлкен әлеуетін көріп отыр. JSI аккредиттеген жеті ұйымның алтауы біздің астанамызда орналасқан. Үшіншіден, Нұр-Сұлтан - Еуразиядағы үздік көрме орталығы. Біз Халықаралық конгресстер мен конференциялар қауымдастығының Еуразиядағы ең ірі мүшесіміз. Халықаралық деңгейдегі шаралар шетелдік қонақтарды көбейтіп қана қоймай, қала экономикасының дамуына ықпал етеді», - деді А. Көлгінов.
Еске сала кетсек, ТМД аумағында алғаш рет Нұр-Сұлтанда PATA Travel Mart 2019 Азия-Тынық мұхиты елдерінің халықаралық туристік көрмесі ашылды. Оған Азия-Тынық мұхиты аймағы елдерінің 250-ден астам туристік компаниясы қатысуда. Көрме аясында Tax Free Қазақстанның туристерге салықсыз жүйесі іске қосылады.