Нұр-Сұлтан блокпосттарында тәртіп бұзған 128 адам жазаланды

НҰР-СҰЛТАН. ҚазАқпарат - Елордада карантин жарияланғаннан бері блокпостқа кіріп-шығу тәртібін бұзғаны үшін 128 адам жазаланды. Оның 99-ы қамауға алынып, 19 азаматқа айыппұл салынды, тағы 10 іс сот қарауына жолданды, деп хабарлайды ҚазАқпарат Нұр-Сұлтан қаласы әкімдігінің ресми сайтына сілтеме жасап.

«30 наурыздан бастап төтенше жағдай режимі күшейтілді. Нұр-Сұлтан қалалық полиция департаменті инфекция таралуының алдын алу мақсатында барлық қажетті шаралар қабылдауда. Патруль полиция жасақтары көбейтілді. Азаматтардың және автокөліктердiң қозғалысы қаланың барлық ауданында қатаң бақылауға алынды», дейді қалалық полиция департаментінің баспасөз өкілдері.

Сондай-ақ қалада тәулік бойы кезекшілік жұмыс істейді. Мобильді топтар жұмылдырылған. Блок посттағы жағдай дрон арқылы бақыланады.

Қала аумағы көшелер бойынша бірнеше бөлікке бөлінген. Онда тәртіп сақшылары жағдайды қадағалап отырады.

Қалада жалпы саны 26 блокпост қойылған.

Айта кетсек, 28 наурыздан бастап елорда тұрғындарына азық-түлік алуға, медициналық қызметке жүгінуге немесе дәрі-дәрмек сатып алуға және арнайы рұқсат бойынша жұмысқа баруға рұқсат етіледі.

Қалған азаматтардың үйден шығуына шектеу қойылды. Кәмелет жасқа толмағандар ересектердің қарауынсыз қалада жүруге болмайды.

Отбасы мүшелерін қоспағанда, көшеде 3 адамнан артық топталып жүруге тыйым салынған.