«Нұр Отан» партиясының кезекті XVIII съезі өтеді

АСТАНА. ҚазАқпарат - Астанада 27 ақпанда «Нұр Отан» партиясының кезекті XVIII съезі өтеді. Бұл туралы Facebook-те Партия төрағасының бірінші орынбасары Мәулен Әшімбаев жазды, деп хабарлайды ҚазАқпарат.

«Құрметті достар! Алдағы 27 ақпан күні «Нұр Отан» партиясының кезекті XVIII съезі өтеді. Съезді шақыру жөніндегі қаулыға бүгін Елбасы, партия Төрағасы Н.Ә.Назарбаев қол қойды», - деп жазды ол.

Мәліметке сәйкес, кезекті съезд партияның 20 жылдығына орай ұйымдастырылып отыр. Съезде партияның 2030 жылға дейінгі жаңа бағдарламасын талқылау, партия Жарғысына өзгертулер мен толықтырулар енгізу, партиялық органдардың есебін тыңдау және партия Саяси кеңесінің құрамын жаңарту жоспарлануда.

«Аталған съездің партиямыздың 20 жылдығы аясындағы басты іс-шара боларына және алдағы жылдардағы мақсат-міндеттерді анықтап, біздің саяси ұйымның одан әрі жаңғыруына тың серпін беретініне сеніміміз мол» деп түйіндеген сөзін Мәулен Әшімбаев.