17:47, 07 Қараша 2022 | GMT +6
Нокаут алған Айдос Ербосынұлының өміріне қауіп төніп тұрған жоқ – дәрігерлер
АСТАНА. ҚазАқпарат – Suleimen Promotions компаниясы өздерінің Instagram парақшасында қазақстандық боксшы Айдос Ербосынұлының жағдайына қатысты ресми мәлімдеме жасады, деп хабарлайды ҚазАқпарат.
«Әлем чемпионы титулы үшін болған жекпе-жектен кейін Айдос Ербосынұлы Миннеаполистегі ең жақсы ауруханаға жатқызылды. Дәрігерлердің айтуынша, өміріне қауіп төніп тұрған жоқ, екі аптаға жуық дәрігерлердің бақылауында болады», - делінген хабарламада.
Бұған дейін хабарланғандай, өткен демалыс күндері супер орта салмақта WBA нұсқасы бойынша «тұрақты» әлем чемпионы титулы үшін өткен жекпе-жекте Ербосынұлы кубалық Давид Моррельден ауыр нокаут алып, жеңіліп қалған болатын.
Кейіннен ауруханаға жеткізілген еді. Бүгін Айдостың жасанды комада жатқаны белгілі болды.
Фото: instagram.com/suleimen_promotions_official