Нидерланд-Аргентина: Әлем чемпионатының 1/2 финалына жолдама кімге бұйырады

АСТАНА. ҚазАқпарат - Қатарда өтіп жатқан футболдан 2022 жылғы әлем чемпионатында бүгін, 9 желтоқсанда 1/4 финалда Нидерланд пен Аргентина құрамалары кездеседі, деп хабарлайды ҚазАқпарат тілшісі.

Кездесу елорда уақытымен 1.00-де басталып, «Qazaqstan» және «Qazsport» телеарналарынан тікелей эфирде көрсетіледі.

Ойын Лусаил қаласындағы 89 мыңға жуық орынға есептелген «Лусаил Айконик» стадионында өтеді.

Бас төреші – испаниялық Антонио Лаос. Оған отандастары Пау Себриан Девис пен Роберто Диас Перес Дель Паломар көмекші болады. Қосалқы төреші – Оңтүстік Африкадан келген Виктор Гомес.

FIFA рейтингінде Нидерланд – 8, Аргентина 3-орында тұр.

Екі құрама бұған дейін тоғыз мәрте кездесті. Төртеуінде нидерландтықтар, біреуінде аргентиналықтар жеңіске жетсе, төрт кездесу тең нәтижемен аяқталды.

2014 жылғы әлем чемпионатында жартылай финалда Аргентина Нидерландпен негізгі кезеңде 0:0 есебімен тең түсіп, пенальтиде 4:2 есебімен қапы қалдырды. Сол кеткен есені нидерланд футболшылары қайтара ала ма?

Топтық кезеңде А тобында ойнаған Нидерланд Сенегал мен Қатардан 2:0 есебімен басым түсіп, Эквадормен 0:0 есебімен тең ойнады. 1/8 финалда АҚШ құрамасын 3:1 есебімен тізе бүктірді.

Ал С тобында Аргентина Сауд Арабиясына 1:2 есебімен есе жіберіп, Мексика мен Польшаны 2:0 есебімен жеңді. 1/8 финалда Австралияны 2:1 есебімен ұтты.

Әлем чемпионатында Нидерланд 1974, 1978, 2010 жылда күміс жүлдегер атанды.

Аргентина құрамасы 1978, 1986 жылдарда әлем чемпионы атағын жеңіп алды.

Сондай-ақ 9 желтоқсанда елорда уақытымен 21:00-де Хорватия мен Бразилияның 4/1 кездесуі «Qazaqstan» мен «Qazsport» телеарналарынан тікелей эфирде көрсетіледі.