Назарбаев зияткерлік мектептерінің түлектері білімдерін қайда жалғастырады
"Жапон университеттерінің өкілдері келіп, кәсіби бағдарлау жұмыстарын жүргізіп жатыр. Жыл сайын Гонконг инженерлік университеті 20-30 тегін грант бөледі. Корея университеттері де грант бөледі, біздің базада өз көрмелерін өткізіп жатыр. Жақында біздің балалар оқуға түскен Мәскеудің жоғары экономика мектебінен хат алдым. Отандық университеттер де, әсіресе Қазақ-Британ университеті, IT-университет, Қазақ ұлттық университеті үлкен қызығушылық танытып отыр", - деді К.Шамшидинова Астанада өткен ІХ халықаралық ғылыми-практикалық конференцияда.
Басқарма төрайымының айтуынша, НЗМ түлектерінің 90 пайызы қазақстандық ЖОО-ларда мемлекеттік немесе университет грантымен білім алуда. Оның 24% Назарбаев Университетінде оқыса, 10% - шет елдерге аттанады. Өткен оқу жылы Назарбаев зияткерлік мектептерінен 400 оқушы түлеп ұшқан.
Бүгінде Қазақстан өңірлерінде 21 мектеп ашылған, онда 13 мыңнан астам бала білім алып, 2 мыңнан астам мұғалім жұмыс істеуде.