Наурызды жақсылық пен жасампаздыққа ұмтылудың нышаны деп қабылдаймыз – Сенат төрағасы

АСТАНА. ҚазАқпарат – Парламент Сенатының төрағасы Мәулен Әшімбаев Қазақстан халқын әз-Наурыз мейрамымен құттықтады, деп хабарлайды ҚазАқпарат.

«Құрметті достар! Баршаңызды Наурыз мейрамымен шын жүректен құттықтаймын!

Әз-Наурыз – қуаныш пен шаттықтың, жаңару мен жаңғырудың мерекесі. Тереңнен тамыр тартатын бұл мейрамды жақсылық пен жасампаздыққа ұмтылудың нышаны деп қабылдаймыз. Ұлыстың ұлы күнінде ұлттық құндылықтарымыз төрге шығып, салтымыз бен дәстүріміз дәріптеледі.

Шын мәнінде, халқымыз Наурыз айын жылдың басы деп қашанда ерекше көңіл-күймен қарсы алған. Осы күндері ағайын-туыстың басы қосылып, бұлақтың көзін ашу, ағаш отырғызу сияқты ізгі амалдар жасалған. Мұның бәрі – елдің ырысын арттырып, ынтымағын нығайтатын, ұрпақты татулық пен тазалыққа үндейтін игі істер», - деп жазды М.Әшімбаев Facebook-тегі жеке парақшасында.

Сенат спикері тағылымы зор, өнегесі мол осындай мерекеде әр шаңыраққа амандық пен бақ-береке тіледі.

Айта кетейік, Ұлыстың ұлы күні – Наурыз мейрамы Қазақстанда 21-23 наурыз күндері аралығында атап өтіледі. Бұл күндер мерекелік демалыс саналады.