Мұнай акцияларының қайталама нарықтағы саудасы басталды -Әлихан Смайылов

АСТАНА. ҚазАқпарат – «ҚазМұнайГаз» акцияларының бағалы қағаздардың қайталама нарығындағы саудасы ресми ашық деп жарияланды, деп хабарлайды ҚазАқпарат тілшісі.

Шараға қатысқан ҚР Премьер-Министрі Әлихан Смайылов «ҚазМұнайГаз» ІРО-сының ел экономикасына тигізер әсері туралы айтты.

«ҚазМұнайГаздың ІРО-сы Қазақстанның қор нарығы үшін ірі мәмілелердің бірі болып есептеледі. Бұл отандық қаржы нарығын дамытуға, ел азаматтарына, сондай-ақ «Самұрық-Қазына» қоры мен «ҚазМұнайГаз» компаниясына да оң әсерін береді», - деді Премьер-Министр.

Оның пайымынша, мұндай ауқымды шара халықтың инвестиция мәдениеті мен сауаттылығын арттырады.

«ҚазМұнайГаз» бұдан былай Қазақстанның биржалық инвестицияның зәкірлік эмитенті болатынын ескере отырып, біз халықаралық инвесторлардың тарапынан да айтарлықтай қызығушылық танытуды күтеміз. Әрі ашық болуын арттырады, халықтың инвестиция мәдениеті мен сауаттылығы артып келеді», - деді Үкімет басшысы.

Бұған дейін «ҚазМұнайГаз» ІРО-сынан түсетін ақша Ұлттық қорға аударылатыны хабарланған болатын.

Фото: primeminister.kz