Мүмкіндігі шектеулі балалар үшін арнайы арба әзірленетін болды
Spina Bifida - аты жаман ауру. Қазақстанда 254 бүлдіршін осы дертке шалдыққан. Балғындардың денсаулығын оңалту кезінде көптеген қиындықтар кездеседі. Оларды шешу жолдарын ұсынып, мүгедектер арбасына қатысты мәселені біржақты ету мақсатында, «Асыл Бала» республикалық қауымдастығына қарайтын «Асыл Бала» және «Spina Bifida» қоғамдық қорлары ҚР Еңбек және халықты әлеуметтік қорғау министрі Мадина Әбілқасымовамен кездесті.
Министрмен негізгі үш бағыт бойынша проблемалар талқыланды. Мәселен, жергілікті әкімдіктер бюджеттен ақша бөліп, мүмкіндігі шектеулі жандарға арба сатып алады. Ол арбалар, әсіресе, бүлдіршіндер үшін өте қолайсыз. Себебі, әр баланың салмағы, бойы және диагнозы әртүрлі.
«Жұлын және омыртқа дамуында күрделі кемістігі бар балалар мемлекет тарапынан беріліп жүрген арбаларды пайдаланса, ауруы одан сайын асқынады: омыртқасы қисайып, денесінде ойықтар пайда болады. Сондықтан, арбаны баланың ерекшеліктеріне сәйкес, индивидуалды түрде дайындау өте маңызды. Ол үшін, әр ата-ана мемлекет қаржысынан өз баласына арбаға тапсырыс бере алатындай монетизация жүйесін ойластыру қажет. Өкінішке қарай, мұндай арбаларды тек шетелде дайындайды», - дейді «Асыл бала» қорының баспасөз қызметі.
Мадина Әбілқасымова айтылған мәселелерді мұқият тыңдап, «Асыл Бала» өкілдерінің өтінішін қолдайтынын айтты. Сондай-ақ, арбаға қатысты мәселені түбегейлі шешу үшін арнайы комиссия құру туралы шешім қабылданды.
Одан өзге, «Асыл Бала» және «Spina Bifida» қоғамдық қорлары мен Еңбек және халықты әлеуметтік қорғау министрлігінің өкілдері бірігіп, «Атамекен» ҚР ҰКП-на елімізде мүмкіндігі шектеулі азаматтар үшін арба дайындайтын зауыт ашуға қатысты өтінім жасайтынын мәлімдеді.