Мүгедектігі бар адамдар партиялық тізімдерге міндетті түрде енгізіледі – Қанат Мусин
2022 жылғы 19 қаңтар 12:06

Мүгедектігі бар адамдар партиялық тізімдерге міндетті түрде енгізіледі – Қанат Мусин

НҰР-СҰЛТАН. ҚазАқпарат – Парламент Мәжілісі «Саяси партиялар туралы» Қазақстан Республикасының Заңына өзгеріс енгізу туралы» заң жобасын мақұлдады, деп хабарлайды ҚазАқпарат тілшісі.

Заң жобасын қабылдаудың мақсаты - квоталанатын санаттарды оған мүгедектігі бар адамдарды енгізе отырып кеңейту. Әйелдерді, жастарды және мүгедектігі бар адамдарды елдегі саяси мәселелерге белсенді тарту норма шығару процесіне қатысу арқылы елдің неғұрлым осал және проблемалық мәселелерін шешуде осы санаттардың пікірін ескеруге мүмкіндік береді.

«Ұсынылып отырған заң жобасы әйелдер мен жастармен қатар, сондай-ақ мүгедектігі бар адамдарды партиялық тізімдерге міндетті түрде енгізуді көздейді. Бұл Мемлекет басшысының квоталанатын санаттарды кеңейту жөніндегі тапсырмасын іске асыруға байланысты. Оған сәйкес «Сайлау туралы» Конституциялық заңнан басқа, «Саяси партиялар туралы» Заңға тиісті түзетулер енгізу қажет», - деді ҚР Әділет министрі Қанат Мусин.

Мәжілістің Заңнама және сот-құқықтық реформа комитетінің мәліметінше, бұдан басқа, депутаттық мандаттарды бөлу кезінде әйелдерді, жастарды және мүгедектігі бар адамдарды міндетті түрде қосу әлеуметтік артықшылықтарға ие. Сонымен, саяси лауазымның осы санаттарымен айналысу әлеуметтік-саяси, құқықтық мәселелерді шешуде олардың пікірлерін ескеруге мүмкіндік береді. Өмірдің барлық салаларындағы белсенділікті және қоғамның одан әрі әлеуметтік-экономикалық дамуын арттырады.

Бұдан бұрын хабарланғандай, Мәжіліс «Қазақстан Республикасындағы сайлау туралы» Қазақстан Республикасының Конституциялық заңына өзгерістер мен толықтырулар енгізу туралы» Қазақстан Республикасы Конституциялық заң жобасын мақұлдады.


Автор:
Тілші

Jańalyqtar

MURAǴAT