Мойынқұмда өз бетінше алтын қазбақ болған азамат ұсталды
Бұл туралы облыстық полиция департаментінің баспасөз қызметі мәлімдеді.
«15 ақпан күні рейд кезінде Бірлік - Мойынқұм-Ұланбел автожолының 98-шақырымында «Toyota Land Cruiser 80» автокөлігі тоқтатылды. Мойынқұм ауылының 38 жастағы тұрғынының көлігін тексеру кезінде багажынан 15 пакетке салынған «аммонит» жарылғыш заты және 17 капсула мен алты орама сым табылып, тәркіленді», - делінген ведомство таратқан хабарламада.
Ұсталған азаматтың айтуынша, жарылғыш затты ол Ұланбел ауылынан 300 шақырым жердегі қараусыз қалған әскери ғимараттың ішінен тауып алған. Бұл затты ол Мойынқұм қойнауынан алтын кенін өндіру кезінде жарылыс жасау үшін пайдаланбақ болған.
Айыпты өз кінәсін толық мойындап, жарылғыш заттарды сатып алуға және тасымалдауға заңмен тыйым салынғанынан хабардар екенін жеткізді. Бүгінде аталған факті бойынша сот жарылыс-техникалық сараптамасы тағайындалған. ҚР ҚК 287-бабы 3-бөлігі бойынша сотқа дейінгі тергеу басталған.
Айта кетейік, аталған бап бойынша бес жылға дейін бас бостандығынан айыру жазасы қарастырылған.