Министрлік республикалық маңызы бар жолдарға бағалау жүргізді
«Өткен жылы қозғалыс республикалық маңыздағы жолдардың 641 шақырымында ашылды. Енді жүргізушілер «Теміртау – Қарағанды – Балқаш – Қапшағай» жолының 61 шақырымдық учаскесінде еш кедергісіз жүре алады. Сондай-ақ, көлік қозғалысы «Орталық – Шығыс» дәлізінің 249 шақырымында ашылды. Бүгінгі таңда «Көкшетау – Петропавл – РФ шекарасы» жолының 16 шақырымы да көлік қозғалысы үшін ашық», - делінген ҚР ИИДМ баспасөз қызметінің мәліметінде.
Мұнымен қоса, реконструкциядан өткен «Бейнеу – Ақжігіт» жолының 85 шақырымында, «Таскескен – Бақты» жолының 18 шақырымында, «Шучинск – Зеренді» жолының 80 шақырымында, «Қандыағаш – Мақат» жолының 26 шақырымында, «Жетібай – Жаңаөзен» жолының 73 шақырымы мен Нұр-Сұлтан қаласының айналма жолындағы 34,4 шақырымда қозғалыс қамтамасыз етілді.
2019 жылы күрделі жөндеумен қамтылған автомобиль жолдарының жалпы ұзындығы 438 шақырымды құрады. Олардың 24 шақырымы пайдалануға берілді. Сондай-ақ, өткен жылы жолдың 1101 шақырымында орташа жөндеу жасалды. Жасалған орташа жөндеу жұмыстары жолдардың 424 шақырымында ресайклинг, 256 шақырымында жабындыны төсеу, 414 шақырымында кедір-бұдырлы жол бетін өңдеу, 7 шақырымында микросюрфейсинг әдісімен жасалды.
«Өткен жылдың қорытындыларына сәйкес жақсы және қанағаттандырарлық жағдайдағы республикалық маңызы бар автомобиль жолдарының үлесі 21,9 мың шақырымды немесе 88% құрады. І және ІІ техникалық санаттағы жолдардың үлесі 34 % дейін жеткізіліп, 8,4 шақырымды құрады», - делінген министрлік хабарламасында.