Министр: маусымдық аллергия вакцинацияға қарсы медициналық көрсеткіш емес

НҰР-СҰЛТАН. ҚазАқпарат – ҚР Денсаулық сақтау министрі Ажар Ғиният маусымдық аллергиясы барларға неге вакцина егуге болатынын түсіндірді, деп хабарлайды ҚазАқпарат тілшісі.

«Маусымдық аллергиялар вакцинацияға қарсы медициналық көрсетілім болып есептелмейді. Қарсы көрсетілім болу үшін ауыр аллергиялық ауру болуы керек. Қарапайым ерітіндінің өзіне реакция беретін жайттар да болады. Дәрігер әр емделушіні қарап, құжаттарын тексерген кезде ауыр аллергиялық ауруы бар ма, екпеге қарсы реакциясы бар ма, анықтайды. Маусымдық аллергия болған жағдайда емделушінің денсаулығында күрделі ауытқу болмаса, қан талдамасы қалыпты болса, дәрігер әр жағдайды жеке қарап, вакци н ацияға жіберу туралы шешім қабылдайды деп ойлаймын», -деді Ажар Ғиният.

Министрдің мәліметі бойынша, елордада мемлекеттік қызметкерлердің коронавирус жұқтыруы жиілеген.

«Біз Президент іс басқармасының медициналық қызметінен статистика алып отырамыз. Мемлекеттік қызметшілердің денсаулығын сол қызмет қадағалайды. Мемлекеттік қызметшілер арасында өсім бар екенін көріп отырмыз. Нұр-Сұлтанның «сары» аймаққа кіргенін білесіздер. Бұған дейін 10-ға жетпейтін саусақпен санарлық жайттар тіркеліп келген. Қазір мемлекеттік қызметшілер арасында тәулік сайын науқастанудың 100 жағдайы тіркеледі», - деді ведомство басшысы.