Министр электр станциялары жабдықтарын жөндеу мерзімі сақталмаған өңірлерді атады

НҰР-СҰЛТАН. ҚазАқпарат – Еліміздің 4 облысында электр станцияларының негізгі жабдықтарын жөндеу мерзімдері сақталмаған. Бұл туралы Үкімет отырысында ҚР Энергетика министрі Мағзұм Мырзағалиев айтты, деп хабарлайды ҚазАқпарат тілшісі.

«Энергетикалық кәсіпорындардың күзгі-қысқы кезеңдегі жұмысқа дайындығы жалғасуда. Жүйелік оператор бекіткен графикке сәйкес электр станциялардағы 4 энергоблок, 18 қазан, 19 турбина жөнделді. Ал 2 энергоблок, 25 қазан мен 16 турбинаны бойынша жөндеу жұмыстары әлі де жалғасуда. Бүгінгі күнге жоспар бойынша 20 464 шақырым электр беру желілерінің 13 773 шақырым жөнделсе, ал 462 қосалқы станцияның 316 қалпына келтірілді. Бұл желілер бойынша жылдық жоспардың 67, ал қосалқы станциялар бойынша 68 пайызды құрайды», - деді министр.

Алайда, оның дерегінше, Атырау, Қарағанды, Павлодар, Солтүстік Қазақстан облыстарында электр станцияларының негізгі жабдықтарын жөндеу мерзімдері сақталмаған.

«Атомдық және энергетикалық қадағалау мен бақылау комитеті облыс әкімдіктерімен бірлесіп, энергетикалық кәсіпорындардың алдағы жылыту маусымына дайындығына тұрақты бақылау жүргізіп, электр станцияларындағы жөндеу жұмыстарын уақтылы аяқтау бойынша іс-шаралар қабылдап жатыр», - деді ол.