Миллиардтаған теңгені ұрлаған талдықорғандық есепшінің ісіне Антикор араласты

ТАЛДЫҚОРҒАН. ҚазАқпарат - Сыбайлас жемқорлыққа қарсы қызмет Жетісу облысының прокуратурасының үйлестіруімен Талдықорған қаласының білім бөлімінің қызметкерлерін ұстады, деп хабарлайды ҚазАқпарат.

Аталған азаматтар білім беру саласында іс жүзінде жұмыс істемейтін үлестес тұлғалардың пайдасына жалақы түріндегі өтеусіз аудару жолымен аса ірі мөлшерде бюджет қаражатын жүйелі негізде ұрлады деп күдіктенеді.

Алдын ала келтірілген залал сомасы шамамен 2 млрд теңгені құрады.

«Қазіргі таңда істің мән-жайларына тиесілі 29 жылжымайтын мүлік объектісіне, қымбат автокөліктерге тыйым салынды.

Күдікті адамдар ұсталып, соттың санкциясымен қамауға алынды.

Сотқа дейінгі тергеу жалғасуда», - деп жазды Антикордан.

ҚПК-нің 201-бабына сәйкес тергеу мүддесі үшін өзге ақпарат жария етуге жатпайды.

Сонымен бірге, Конституцияның 77-бабы 3-тармағының 1-тармақшасына және Қылмыстық-процестік Кодексінің 19-бабы 1-бөлігіне сәйкес, қылмыстық құқық бұзушылық жасаудағы кінәсі соттың заңды күшіне енген үкімімен белгіленгенге дейін әрқайсысы кінәсіз деп есептеледі.

Бұған дейін прокуратура талдықорғандық есепшілердің ұсталғанын растаған.