«Милан» ФК қытайлықтарға 740 млн еуроға сатылды

АСТАНА. ҚазАқпарат - Италиялық кәсіпкер Сильвио Берлускони «Милан» футбол клубын қытайлық компанияға сатты, деп хабарлайды Лента.ру.

Берлускониға тиесілі Fininvest фирмасы қытайлық-америкалық Sport Investment Lux консорциумына клубтың 99,93 пайыз акциясын сатты.

Келісімшарттың құны 740 млн еуро. Аталған қаржының 220 миллионы «Миланның» қарыздарын өтеуге жұмсалмақ. Берлускони «Милан» клубын 1986 жылы сатып алған болатын.

Содан бері команда Италия чемпионатын 8 рет, Италия Кубогын 1 рет, елдің супербкубогын 7 рет, Чемпиондар лигасын 5 рет, УЭФА суперкубогын 5 рет жеңіп алды. Екі рет континентаралық кубоктың, бір рет клубтар арасындағы әлем чемпионатын жеңіп алды.

Соңғы рет ақ-қара түсті киімділер 2010/11 кезеңінде А сериясын жеңіп алған болатын. Ағымдағы маусымда команда 31 турдан кейін көш басында келе жатқан «Ювентустан» 20 ұпайға кейін қалып, 6 орында келеді.