Мерейлі отбасы: Шахтинск қаласында тұратын кеншілер әулеті жеңімпаз болды
2021 жылғы 10 қыркүйек 22:23

Мерейлі отбасы: Шахтинск қаласында тұратын кеншілер әулеті жеңімпаз болды

ҚАРАҒАНДЫ. ҚазАқпарат – Отбасы күні қарсаңында Қазақстанда «Мерейлі отбасы» ұлттық байқауының жеңімпаздарын марапаттау рәсімі өтті. Косолаповтар әулеті Қарағанды облысының үздік отбасы деп танылды, деп хабарлайды ҚазАқпарат тілшісі.

Биыл Қазақстанда 17 жеңімпазды марапаттау рәсімі ҚР Мемлекеттік хатшысы Қырымбек Көшербаевтың төрағалығымен онлайн түрде өтті.

Мемлекет басшысының дипломын, мүсіншені және ақшалай сертификатты Қарағанды облысынан конкурс лауреатына өңір басшысы Жеңіс Қасымбек тапсырды.

«Міне, бірнеше жыл бойы біз барлық қазақстандықтарға нағыз отбасылық құндылықтардың, еңбекқор, ұйымшыл, тату отбасының үлгісін көрсету үшін үлгілі отбасыларды таңдап келеміз. Жалпы еңбек өтілі 365 жылдан асатын, бай еңбек тарихы бар кеншілер әулетін біздің облысымыздан жеңімпаз ретінде көріп отырғанымызға қуаныштымыз», – деді ол.

Косолаповтар отбасы – төрт ұрпаққа тараған кеншілер.

Отағасы Валерий Косолапов Ленин атындағы шахтада тік ұңғылардың үңгілеушісі, ал жұбайы Людмила Волокитина – аға табельші болып жұмыс істейді.

18 жыл бұрын неке құрған және қазіргі күні екі ұл тәрбиелеп отыр.

«Біз осыған дейн де «Мерейлі отбасы» байқауына қатысқан болатынбыз. 2017 жылы қалалық турда бірінші орын алдық. Бұл жолғы жеңіс - біз үшін күтпеген оқиға болды. Себебі мықты және осы атауға лайықты қарсыластар көп болды. Біз - қарапайым тату және көпұлтты отбасымыз. Бізде дәстүр сабақтастығы сақталған. Балаларды отбасылық құндылықтар рухында тәрбиелейміз», – дейді Людмила Волокитина.

Жеңімпаз отбасының айтуынша, олардың шаңырағында орнаған бақытты некенің басты құпиясы – өзара көмек пен түсіністік.

Ерлі-зайыптылар үйленіп, балалары болғаннан бері «мен» сөзін ұмытып, оны «біз» дегенге ауыстырған.

Естеріңізге сала кетейік, «Мерейлі отбасы» ұлттық байқауы адамгершілік құндылықтарды жаңғыртуға және отбасы мен некенің оң бейнесін насихаттауға, сондай-ақ отбасы мәртебесін арттыруға бағытталған.

Ол Елбасының бастамасымен 2014 жылдан бері өткізіліп келеді.


Jańalyqtar

MURAǴAT