Мереке қарсаңында Кентау қаласында 120 отбасы қоныс тойын тойлады

ТҮРКІСТАН. ҚазАқпарат - Бүгін Кентау қаласында Қазақстан Республикасының Тұңғыш Президенті күні мерекесі қарсаңында 60 пәтерлі 2 көпқабатты тұрғын үй пайдалануға берілді. 

Салтанатты шараға арнайы қатысқан Түркістан облысының әкімі Жансейіт Түймебаев, үй кезегінде тұрған азаматтарға баспананың кілтін тапсырды, деп хабарлайды Түркістан облысы әкімдігінің баспасөз қызметі.

«Елбасымыз халықты тұрғын үймен қамтамасыз ету үшін бірнеше бағдарламаларды іске қосты. Атап айтсақ, «Нұрлы жол», «Нұрлы жер» және «7-20-25» бағдарламалары қазақстандықтарға шарапатын тигізуде. Оған бүгін Сіздер де куә болып отырсыздар. Мұндай қуаныштар мұнымен шектелмейді. Үй кезегінде тұрған барлық азаматтар кезең-кезеңімен баспаналы болады», - деді Жансейіт Қансейітұлы.

«Нұрлы жер» мемлекеттік бағдарламасы аясында салынған нысандардың жалпы жобалық - сметалық құны 898 млн. 686 мың теңгені құрайды. «Стройсервис XXI» ЖШС 5 қабатты ғимараттардың құрылыс жұмыстарын 2017 жылы бастаған. «Южказпроект» ЖШС жобалау жұмыстарын атқарса, нысандардың техникалық қадағалауына «Royal Company» ЖШС жауапты.

Айта кетейік, жыл соңына дейін 2 қабатты 5 қызметтік үй пайдалануға берілмек. Сондай-ақ, 2019 жылы Кентау қаласында қосымша 60 пәтерлі 5 тұрғын үй ел игілігіне тапсырылады. Жалпы 300 пәтер болатын жобаның сметалық құны 2 175 млн. теңгені құрайды.