Менингиттен қалай қорғануға болады: Бас санитарлық дәрігер кеңестерін берді
«Осы жағдайларда бірінші кезекте ғимарат ішін, бөлмелерді жиі желдетіп тұру, дезинфекциялық заттармен тазарту секілді шараларды өткізіп тұруға кеңес береміз. Ең бастысы, мұрын-жұтқыншақтың қабынуы, салқын тию белгілері бар науқастар шұғыл түрде медициналық қызметкерлердің көмегіне жүгінуі керек. Бұл ретте қайғылы оқиғалардың барлығы науқастардың денсаулық сақтау ұйымдарына тым кеш келуінен болады», - деді Бекшин.
Оның айтуынша, менингиттің қоздырушысы үнемі қоғамда циркуляцияда болады, ал қазіргі құбылмалы ауа райы, күннің салқындауы бактерияның айналымына қолайлы. Өткен жылдардағыдай А типі байқалды, сәйкесінше бүгінде Алматыда эпидемиологиялық сырқаттану тіркелді.
«Атап айтқанда, бұл дерт маусымдық сипатқа ие және ол салқын кезеңде, яғни көктемде тіркеледі. Осы аралықта адамның иммунитеті әлсірейді. Алматыда аурушаңдық толқынды циклдік мәнге ие. Бүгінде Алматыда зертханалық тұрғыда расталған менингиттің 29 оқиғасы тіркелді. Біз қазір бұл бағытта тиісті шараларды жүргізіп жатырмыз», - деді комитет басшысы.
Осы орайда ол қазіргі кезде мектептерде оқу жылының аяқталуы да өзінің оңтайлы рөлін атқаратынын атап өтті.
«Бактерияларды күн сәулелері жояды, сондықтан күннің жылынуына қарай ару-сырқау да төмендейді. Дегенмен де балаларға арналған мекемелерде профилактикалық шараларды атқарудамыз. Тәрбиешілер мен медициналық қызметкерлер балаларды үнемі тексеріп отырады», - деді Жандарбек Бекшин.
Бұдан бұрын хабарланғандай, әлеуметтік желіде тараған Алматыдағы менингококк инфекциясы туралы хабарламаға Қоғамдық денсаулық сақтау департаментінен жауап беріп, қалада менингит эпидемиясы жоқтығын мәлім еткен болатын.
Бірнеше күннен кейін менингиттен 5 жасар бала көз жұмды.Қоғам денсаулығын қорғау департаментінің басшысы Айзат Молдақасымова айтуынша, соңғы күндері ауруханаларға 47 адам жүгінген. Олардың 15-інде диагноз зертхана арқылы расталған. 15 адамның ішінде екі ересек және 5 жасар бала қайтыс болды.