Менімен шырқа: Димаштың інісі шығарған жаңа әнінің бейнебаяны жарық көрді

None
Видеодан алынған кадр
АСТАНА. ҚазАқпарат – Димаш Құдайберген інісі Әбілмансұрдың алғашқы композиторлық туындысына жаңа бейнебаян шығарды, деп хабарлайды ҚазАқпарат.

Димаш, Әбілмансұр және Раушан Құдайберген басты рөлдерді сомдаған «Бірге» клипінің сюжеті достық пен жақындардың қолдауының маңыздылығын баяндайды.

Інісі ағасымен бірге Ғаламды аралап, өмірге қолайлы жаңа планеталарды іздеп, Жерге қуанышпен оралады және кенеттен таңғажайып нәрселерді көре бастайды. Мұздап қалған ыдыстар, ағасының айнадағы көрінісі, жылы естеліктер... «Together» клипі осылай басталады.

Мен Димаштың дауысын алғаш естігенде оның вокалдық қабілетіне қатты тәнті болдым. Бүгінде ол әлемдегі ең үздік әншілердің бірі екеніне сенімдімін. Даусының тембрі сізді ғаламшардан тыс жерге апаратын сияқты. 2022 жылдың соңында жақын досым Ғалым Асылов Димаштың болашақ бейнебаянының сценарийін бірлесіп жазуды ұсынды. Бұл мүмкіндік мені қатты шабыттандырды. Бірнеше күн бойы біз клиптің негізгі концепциясын талқылап, әлемді құтқару және ғарыш арқылы басқа планеталарға саяхаттау идеясы Димашқа өте қолайлы болады деген қорытындыға келдік. Алғашында бұл ой тым бұлыңғыр болғанымен, талқылау барысында тақырыбы ашыла түсті. Арман мен шындықты араластырудың нақты тұжырымдамасы пайда болды, өйткені Димаштың музыкасы да шындық пен абсолютті қиялдың шегінде тепе-теңдікті сақтайды. Сонымен бірге, біз бейнеде отбасылық құндылықтар идеясын сақтағымыз келді, сондықтан сценарийге кейіпкердің ағасы мен қарындасының кейіпкерлері енгізілді. Сценарийдің өзі бірнеше рет қайта жазылды, біз әрбір эпизодта абсолютті кемелдікке қол жеткізгіміз келді. Қазіргі заманғы түсіру әдістері мен көлемді графиканы пайдалана отырып, сюжетке ғылыми-фантастикалық фильмдердің элементтерін енгізу қажет болды. Димаштың жаңа бейнебаянының көрермендері әннің әрбір нотасын сезініп, біз осы жұмыста жасауға тырысқан ғажайып болашақтың атмосферасына енеді деп сенгім келеді

, - дейді сценарист Андрей Ходин.

Шығарманың негізгі ойларының бірі – «Менімен шырқа, бәрін бірге кешерміз» фантастикалық мозаика бөліктерін бір кенепке біріктіреді. Бейнебаянда да, өмірде де ағайынды музыканттар бірге жұмыс істеген.

Музыканың авторы, он алты жасар Әбілмансұр Құдайберген әуеннің негізгі тақырыбы импровизация ретінде қалыптасқанын, кейін біраз өзгерістерден кейін демонстрацияны үлкен ағасына көрсетіп, мақұлдаған соң Ерлан Бекчурин аранжировка жасағанын айтады.

Бұл – менің алғашқы композиторлық туындым. Өзім немесе достарыммен бірге ән шығарамын. «Together» әні адамдарды жанжалсыз өмір сүруге шақырады, өйткені бәрі тату, бірге болуы керек. Бұл – менің алғашқы бейнебаяным да, түсірілім маған қатты ұнады, қызықты әсер болды, Ғалым-аға Асыловқа алғыс айтамын

, - дейді Әбілмансұр Құдайберген.

Бұған дейін әлемге танымал әнші Димаш Құдайбергеннің «Together» атты жаңа әні жарыққа шыққанын хабарлаған болатынбыз.
Соңғы жаңалықтар