Мемлекеттік-жеке меншік әріптестіктің жаңа нысандарын енгізуге байланысты заң жобасы мақұлданды - Мәжіліс

АСТАНА. 5 маусым. ҚазАқпарат - Бүгін Парламент Мәжілісінің жалпы отырысында палата депутаттары «Қазақстан Республикасының кейбір заңнамалық актілеріне мемлекеттік-жеке меншік әріптестіктің жаңа нысандарын енгізу және олардың қолдану салаларын кеңейту бойынша өзгерістер мен толықтырулар енгізу туралы» заң жобасын екінші оқылымда мақұлдады.

Мәжіліс мақұлдаған құжат Парламент Сенатына жолданады.

Аталған құжат Мемлекет басшысының былтырғы қаңтардағы Жолдауын іске асыру, сондай-ақ мемлекеттік-жеке меншік әріптестікті дамыту үшін жағдай жасау мақсатында әзірленген.

Заң жобасы қолданыстағы 8 заңнамалық актіге мемлекеттік-жеке меншік әріптестіктің жаңа нысандарын енгізуге байланысты өзгерістер енгізуді қарастырады. Бұдан бөлек, құжат келісімшарттық мемлекеттік-жеке меншік әріптестіктің жаңа үлгілерін енгізуді, әлеуметтік бағыты бар инвестициялық жобалар бойынша жеке сектор үшін тартымды жағдайлар жасауды көздейді. Заң жобасымен жұмыс барысында депутаттар құжаттың мазмұнын біршама толықтырды.

Атап айтқанда, мемлекеттік уәкілетті органдардың мемлекеттік-жеке меншік әріптестік саласындағы құзыретін нақтылау, конфессионерлердің қызметін мемлекеттік қолдау бағытындағы өзгерістер қамтылды.