АСТАНА. ҚазАқпарат – Сыбайлас жемқорлыққа қарсы іс-қимыл агенттігінің қоғамдық кеңесі былтыр мемлекеттік сатып алулар кезінде тауар құны қымбат етіп көрсетілген 1 мыңнан астам жайтты анықтаған. Бұл туралы аталған кеңестің мүшесі Дидар Смағұлов айтты, деп хабарлайды ҚазАқпарат тілшісі.
«Өткен жылы біз 2500-ге жуық азаматқа тегін заң көмегін көрсеттік. Ұйымға барлығы 5 мыңнан астам өтініш келіп түсті. Олардың көпшілігі объектілерді салу және мемлекеттік сатып алуларды жүзеге асыру кезінде сыбайлас жемқорлыққа қатысты күдікпен байланысты болды. Өткен жылы біз 20 млрд теңгеден астам сомаға 1 мыңнан астам тәуекелді сатып алуды анықтадық. Шенеуніктер сатып алуларды жоғары бағамен жүзеге асыруға тырысқан жағдайлар жиі кездеседі», - деді Дидар Смағұлов.
Оның мәлімдеуінше, қоғамдық кеңестің өтініштері негізінде өткен жылы мемлекеттік сатып алу процесінде олқылыққа жол берген 183 лауазымды тұлға тәртіптік және әкімшілік жауапқа тартылған.