Мемлекеттік органдардың петицияны қарау мерзімі қысқартылмақ

None
АСТАНА. ҚазАқпарат – Бүгін Мәжілістің жалпы отырысында «Қоғамдық бақылау туралы» заң мен ілеспе құжат екінші оқылымда қаралып, қабылданды, деп хабарлайды ҚазАқпарат тілшісі.

«Аталған заң жобалары мемлекеттік органдардың, квазимемлекеттік сектордың ашық болу дәрежесін кеңейтіп, азаматтардың қоғамдық белсенділігін арттыруға бағытталған. Заң жобалары Палатаның 2022 жылғы 7 желтоқсандағы жалпы отырысында бірінші оқылымда мақұлданды», - деді Мәжіліс депутаты Ерлан Саиров.

Заң жобаларымен жұмыс барысында депутаттар келесі жүйелі түзетулер енгізді:

- «Самрұқ-Қазына» Ұлттық әл-ауқат қорында және оның еншілес компанияларында мемлекеттік әлеуметтік және ғылыми-инновациялық жобаларға, бюджет қаражаты есебінен іске асырылатын ұлттық жобаларға қатысты, сондай-ақ Қор қайырымдылық көмек көрсеткен кезде қоғамдық бақылауды жүзеге асыру;

- «Назарбаев интеллектуалдық мектептері», басқа да дербес білім беру ұйымдарын қоғамдық бақылау объектілеріне жатқызу;

- қоғамдық бақылау объектісіне барудан бас тарту негіздерін нақты айқындау;

- азаматтарға петиция беру құқығын тек электрондық нысанда ғана емес, қағаз түрінде де беру;

- петицияны орналастыру үшін қажетті дауыстар санын азайту;

- мемлекеттік органдардың петицияны қарау мерзімін қысқарту (орталық мемлекеттік органдар үшін – 60 күннен бастап 40 күнге дейін және жергілікті атқарушы органдар үшін – 20 күнге дейін);

- мерзімді қызметтегі әскери қызметшілердің, сондай-ақ әскери оқу орындары ұландарының, кадеттері мен курсанттарының өмірімен және тұрмысымен танысу үшін олардың отбасы мүшелеріне әскери бөлімдерге, оқу орындарына бару құқығын беру ескерілген.

«Сондай-ақ, заң жобасының тақырыбын өзгерту жөнінде түзету енгізілді. Жұмыс тобына 180-нен астам ұсыныстар келіп түсті, олардың басым көпшілігі қолдау тапты. Азаматтық қоғам, сарапшылар қауымдастығы өкілдері жұмыс тобында жоғары белсенділік танытты. Заң жобасының ең басты мақсаты - Конституцияға сәйкес азаматтардың мемлекет істерін тікелей басқаруға қатысуына жағдай жасау», - деді депутат.


Соңғы жаңалықтар