Мемлекеттік функцияларға жауапты адамдардың көлеңкелі кірісін анықтау тетіктері күшейтілді
Бұл құжат заңнаманы одан әрі жетілдіру және халықаралық озық стандарттар негізінде сыбайлас жемқорлықтың алдын алу құралдарын енгізу арқылы жемқорлыққа қарсы іс-қимылдың тиімді жүйесін қалыптастыруға бағытталған. Заң жобасы 11 заңнамалық актіге, оның ішінде 3 кодекс пен 8 заңға түзетулерді қамтып отыр.
Заң жобасының негізгі міндеттері - мемлекеттік функцияларды орындауға уәкілеттік берілген және оларға теңестірілген адамдардың негізсіз баюын бақылаудың алдын алу шаралары арқылы сыбайлас жемқорлық көріністерін барынша азайту, сондай-ақ сыбайлас жемқорлық фактілері туралы хабарлаған адамдарды тиісінше қорғауды, оның ішінде олардың еңбек құқықтарына нұқсан келмеуіне және берілген ақпараттың құпиялылығына кепілдік беру арқылы қамтамасыз ету.
Заң жобасын қабылдау:
- мемлекеттік функцияларды орындауға уәкілеттік берілген және оларға теңестірілген адамдардың көлеңкелі кірістерін анықтауды;
- мемлекеттің сыбайлас жемқорлыққа қарсы саясатының ашықтығын;
- мемлекеттің әлеуметтік-экономикалық дамуы үшін теріс фактор ретінде сыбайлас жемқорлықты азайтуды;
- сыбайлас жемқорлыққа қарсы іс-қимылда азаматтық қоғамның белсенділігін арттыруды;
- сыбайлас жемқорлыққа қарсы мәдениетті қалыптастыруды қамтамасыз етуге мүмкіндік береді.