Мемлекеттік аудит 244 млрд теңгенің заң бұзушылықтарын анықтады

НҰР-СҰЛТАН. ҚазАқпарат – Жыл басынан бері 3,2 трлн теңге бюджет қаражатына аудит жүргізілді. Бұл туралы ҚР Премьер-Министрінің орынбасары, Қаржы министрі Ерұлан Жамаубаев айтып берді, деп хабарлайды ҚазАқпарат тілшісі.

Биылғы 7 айда 7,3 трлн теңгеге 342 мыңнан астам мемлекеттік сатып алу рәсімдері камералдық бақылаумен қамтылды. Тексеру қорытындысы бойынша 23 286 рәсімде заң бұзушылықтар анықталды, оның ішінде мемлекеттік аудит нысандары оларды жою туралы хабарламалардың 93% орындады», - деді Қаржы министрі Үкіметтің бүгінгі отырысында.

Оның айтуынша, биылғы 7 айда 1 485 аудиторлық іс-шара өткізілді. Шамамен 3,2 трлн теңге бюджет қаражаты аудитпен қамтылып, 244 млрд теңгеге қаржылық заң бұзушылықтар анықталған.

«Тауар жеткізу, қызмет көрсету және жұмыстарды орындау, бюджетке өтеу және есепке алу жолымен 234 млрд теңгенің заң бұзушылықтары жойылды. Аудит объектілері қызметін жетілдіру және тиімділігін арттыру үшін 1 291 ұсыным берілді», - деді Е. Жамаубаев.

Бұған дейін Қаржы министрі мемлекеттік бюджетке 8 трлн 463 млрд теңге кіріс түсіп, жоспардың 105,1%-ке орындалғанын айтқан еді.

Сонымен бірге, республикалық бюджеттің 31 млрд теңгесі игерілмей қалған.

Фото: moneysense.ca