Мемлекет басшысының Абай облысына сапарының видеосы жарияланды

СЕМЕЙ. ҚазАқпарат – ҚР Президенті Қасым-Жомарт Тоқаевтың Абай облысына жасаған жұмыс сапарының видеосы жарияланды, деп хабарлайды ҚазАқпарат БОРТ-1 Telegram-каналына сілтеме жасап.

Еске салайық, бүгін Мемлекет басшысы Абай облысына барды.

Президент, алдымен, өңір жұртшылығымен кездесті. Оның барысында өңірде 65 денсаулық нысаны салынатынын, Абай облысы аумағында ауқымды геологиялық зерттеу жұмысын жүргізу қажеттігін, Семейде жылу электр орталығын салып, инфрақұрылымды жаңарту керектігін айтты. Сондай-ақ халықаралық стандартқа және экологиялық нормаларға сәйкес келетін қоқыс полигонын салуды тапсырды.

Кейін Қ.Тоқаев Семейде Мұхтар Әуезов пен Қайым Мұхамедхановқа орнатылған ескерткіштің ашылу салтанатына қатысты.

Одан әрі Президент Семей қаласында М.Әуезов атындағы педагогикалық колледжге барды. Невзоровтар атындағы бейнелеу өнері музейін аралап көрді.