Мемлекет басшысы Қанат Исламды қабылдады
Кездесу барысында еліміздегі кәсіпқой боксты және балалар мен жасөспірімдер спортын, соның ішінде ауылдық жерлерде бокс үйірмелерін дамыту мәселелері талқыланды.
Орта салмақтағы WBO Inter-Continental белбеуінің иегері Қанат Ислам Қасым-Жомарт Тоқаевқа еліміздің спортшыларына қолдау көрсеткені үшін алғыс айтты.
Мемлекет басшысы боксшының алдағы өтетін жекпе-жектерде жеңіске жетуіне тілектестігін білдірді.
«Белгілі боксшымыз Қанат Исламды WBO Inter-Continental чемпиондық титулын иеленуімен құттықтадым. Алдағы уақытта да халықаралық турнирлерге қатысуына жан-жақты қолдау көрсетілетінін айтып, жаңа табыстар тіледім», деп жазды Мемлекет басшысы Twitter-дегі парақшасында.
Еске сала кетсек, 5 шілдеде Қанат Ислам қарсыласын 14 секундта құлатып, WBO Inter-Continental титулын иеленді және ҚР Президенті Қасым-Жомарт Тоқаев кәсіпқой боксшы Қанат Исламның алда өткізетін жекпе-жектеріне сәттілік тілеген еді.