Мәжіліс спикері ЕҚЫҰ-ның Президент сайлауы туралы қорытындысына пікір білдірді

АСТАНА. ҚазАқпарат – Мәжіліс төрағасы Ерлан Қошанов Еуропа қауіпсіздік және ынтымақтастық ұйымының Президент сайлауы туралы қорытындысына пікір білдірді, деп хабарлайды ҚазАқпарат тілшісі.

«Біріншіден, мұны ұйымның сыны емес, ұсынымы деп түсіну керек. Екіншіден, біткен іске сыншы көп деген сөз бар. Сондықтан, біз өзіміз үшін кімнің пікірі маңызды екенін айқындап алуымыз керек. Меніңше, бізге Қазақстан халқының пікірі маңызды. Қазақстан халқы Қасым-Жомарт Кемелұлына басым көпшілікпен өзінің сенімін, қолдауын көрсетті. Әділ әрі таза сайлау өтті. Бұған ешкімнің ешқандай күмәні жоқ шығар деп мен ойлаймын», - деді Мәжіліс төрағасы.

Сондай-ақ, ол сайлаудың алдында ер аралап, халықтың қазіргі Президенттің саясатына деген ұстанымы қандай екенін көріп қайтқанын еске салды.

«Біз базарларға барып, жұмыссыз жүрген жастармен кездестік. Шахталарға дейін түстік. Бүкіл жерге барсақ та қолдау болды. Қоғамдық ұйымдармен, әртүрлі пікірі бар азаматтармен кездестік. Иә, сын бар. Иә, кейбір мәселелерге байланысты өзінің басқа пікірлері де бар. Бірақ түптеп келгенде, Қазақстанға бірінші кезекте тұрақтылық, алмағайып заманда аумағымыздың, тұтастығымыздың сақталғаны керек. Сыртта болып жатқандарды ішімізге кіргізіп алмауымыз керек. Осыны сіздер дұрыс түсінулеріңіз керек», - деді Ерлан Қошанов.

Мәжіліс төрағасы кезектен тыс өткен Президент сайлауына 35-ке жуық елдің өкілдері келіп, оның көбі оң бағасын бергенін айтты.

«Ал егер сын-пікірлер болса, оған Сыртқы істер министрлігі өзінің пікірін, жауабын айтты. СІМ өзінің келіспейтінін айтты. Бәсекелестік болды. Бес азаматты қалайша бәсекеге лайық емес деп, оларды төмендетуге, құқығын шектеуге болады? Солай бола ма? ЕҚЫҰ-ның бұған дейін берген трафаретті ұсынымдарының көбі ескерілді. Кейбір жерінде психикалық ауытқуы бар азаматтардың да дауысын есептеу керек дейді. Осы бойынша сынайды. Оны қабылдау керек пе, жоқ па? Өз ұстанымымыз, көзқарасымыз бар. Біз егеменді елміз ғой», - деді спикер.

Бұған дейін хабарлағанымыздай, ЕҚЫҰ Қазақстанда өткен президент сайлауына баға берді.

Сыртқы істер министрлігі ЕҚЫҰ миссиясы мәлімдемесіне ресми жауап берді.

Сондай-ақ, Еуропадағы қауіпсіздік және ынтымақтастық ұйымы (ЕҚЫҰ) бюросының демократиялық институттар және адам құқықтары жөніндегі миссиясының мәлімдемесінде ҚР Президенті сайлауында қазақстандық БАҚ кандидаттар туралы ақпарат жариялауда теңдік қағидатын ұстанғаны айтылды.