Мәжіліс депутаттарының 30% қазақстандықтар тікелей сайлайды - Қанат Мусин

НҰР-СҰЛТАН. ҚазАқпарат – Қазақстандықтар Парламент Мәжілісі депутаттарының 30 пайызын тікелей дауыс беру арқылы сайлайды. Бұл туралы ҚР Әділет министрі Қанат Мусин мәлім етті, деп хабарлайды ҚазАқпарат тілшісі.

«Бұған дейін супер президенттік қағидасы туралы айтылды. Енді ықпалды Парламент түсінігіне келсек, бұл жерде депутаттарды сайлау жүйесін енгізу туралы айтуға болады. Қазір Мәжіліс депутаттары партиялық негізде сайланады. Ендігі уақытта Мәжіліс депутаттарының 30 пайызын өңірдегі қазақстандықтар сайлайды. Қалған 70 пайызы партиялық негізде сайланады. Сонымен қатар депутат сайлауалды уәдесі мен міндетін орындамаған жағдайда сайлаушылар даусын кері қайратып алады. Яғни депутаттық мандаттан айрылады», - деді Қанат Мусин Орталық коммуникациялар қызметі алаңында өткен баспасөз мәслихатында.

Министрдің айтуынша, өзгеріс пен жаңашылдық Сенатқа да қатысты.

«Сенаттағы Президент тағайындайтын 15 депутаттың саны 10-ға кемиді. Оның бесеуін Президент ұсынса, қалған депутаттар Қазақстан халқы Ассамблеясының ұсынысы бойынша тағайындалады. Одан бөлек, Парламентке Конституциялық сотта, Жоғары Сот Кеңесінде жоғары лауазымды адамдарды тағайындауға келісім беру, адам құқықтары жөніндегі уәкілді ешкімнің тиіспеуі құқығынан айыру туралы мәселені шешу және Мәжілістің жылына екі рет жоғары төрелік палатаның төрағасын тыңдауы жөнінде қосымша өкілеттіктер беріледі. Мұндағы мақсат -Парламенттің рөлін күшейтіп, ықпалын арттыру», - дейді ол.

Бұған дейін ведомство басшысы суперпрезиденттік пен президенттік форма туралы айтқан еді.

Сондай-ақ, Әділет министрі 4 бастамашы топтың партия құруға қатысты құжаттары қаралып жатқанын айтты.