Мароккодағы турнир: Қазақстанның боксшы қыздары 1-орын алды

АСТАНА. ҚазАқпарат - Марокко елінде өткен «Golden Belt Series Marrakesh» («Алтын белбеу») халықаралық турнирінде еліміздің әйелдер құрамасы медальдар кестесінде бірінші орын алды, деп хабарлайды ҚазАқпарат тілшісі.

Халықаралық турнир 2-10 ақпан аралығында Маррокконың Марракеш қаласында өтті. Онда барлығы 34 елден келген былғары қолғап шеберлері бақ сынады. Қазақстан атынан барлығы 12 боксшы ойын көрсетті.

Нәтижесінде қазақстандық спортшылар барлығы 10 медальға қол жеткізді. Оның ішінде бесеуі – алтын, екеуі – күміс, үшеуі – қола.

«Алтын» алғандар қатарында Алуа Балқыбекова (48 келі), Назым Қызайбай (50 келі), Жайна Шекербекова (54 келі), Карина Ибрагимова (57 келі) және Валентина Хальзова (75 келі) бар.

Ал Аида Әбікеева (63 келі) және Ләззат Күнгейбаева (81 келіден жоғары) «күміске» қол созса, «қола» медаль Надежда Рябец (66 келі), Мәдина Нұршаева (70 келі) және Фариза Шолтайға (81 келі) бұйырды.

Ел құрамасынан Жазира Орақбаева (52 келі) мен Владислава Кухта (60 келі) жүлдесіз қалды.

Медальдар кестесінде екі «алтынмен» Ресей құрамасы екінші орын алса, бір-бір мәрте чемпиондық тұғырға көтерілген Италия, Тайвань, Мозамбик және Марокко одан кейінгі орындарды өзара бөлісті.

Еске салсақ, бұдан бұрын аталған турнирде қазақстандық 7 боксшы қыз финалға шыққанын, кейін оның бесеуі жеңімпаз болғанын жазған едік.

Ашық көздерден алынған фото