Маңғыстауға Дағыстаннан гуманитарлық көмек келді

АҚТАУ. ҚазАқпарат - Маңғыстауға Ресей Федерациясы Дағыстан Республикасынан гуманитарлық көмек келіп жетті,-деп хабарлайды ҚазАқпарат тілшісі.

Бұл көмекті қала, аудан және тиісті мекемелердің қажеттіліктеріне қарай бөліп беру мақсатында «Nur Otan» партиясы Маңғыстау облыстық филиалы қабылдап алды.

Дағыстан Республикасынан келген көмекте медициналық бетперде (100 000 дана), қорғаныс киімі (13 000 дана) және антисептик құралдары (2000 дана) бар.

Бүгін «Nur Otan» партиясының бақылауымен облыс әкімдігі жанынан құрылған арнайы комиссиясы келген гуманитарлық көмекті Маңғыстау облыстық Ішкі істер департаментіне, Маңғыстау облыстық денсаулық сақтау басқармасына, 6656 ҰҰ Әскери бөлімге және қала, аудандарға бөліп жіберу жұмыстарын жүргізді.