Маңғыстауда сыбайлас жемқорлық туралы хабарлағандар 800 мың теңге сыйақы алды

2022 жылғы 1 желтоқсан, 14:25
Маңғыстауда сыбайлас жемқорлық туралы хабарлағандар 800 мың теңге сыйақы алды

АҚТАУ.ҚазАқпарат – Маңғыстауда жыл басынан бері сыбайлас жемқорлық фактілері туралы хабарлаған төрт азамат 800 мың теңге көлемінде сыйақы алды, деп хабарлайды ҚазАқпарат тілшісі.

«Биыл сыбайлас жемқорлық деректері туралы хабарлаған төрт азамат сыйақы алды. Олардың берген ақпараты негізінде қылмыс ашылып, сот үкімі күшіне енген соң комиссия шешімімен сыйақы тағайындалды. Осы азаматтар хабарлаған деректер ауырлығы орташа және ауыр сыбайлас жемқорлық қылмыстық істердің санатына жатады», - деді Сыбайлас жемқорлыққа қарсы қызмет департаментінің аса маңызды істер жөніндегі тергеушісі Зульфия Абишаева.

Сыбайлас жемқорлық жағдайлары туралы хабарлаған адам ақшалай қаражатпен марапатталады және мемлекеттің қорғауында болады.

Сыбайлас жемқорлық құқық бұзушылық фактісі туралы хабарлаған немесе сыбайлас жемқорлыққа қарсы іс-қимылда өзге де жолмен жәрдемдесетін адамдарға біржолғы ақшалай сыйақы мөлшері былай есептеледі:

- сыбайлас жемқорлық құқық бұзушылықтар туралы әкімшілік істер бойынша – 30 АЕК;

- онша ауыр емес сыбайлас жемқорлық қылмыстық істер бойынша – 40 АЕК;

- ауырлығы орташа сыбайлас жемқорлық қылмыстық істер бойынша – 50 АЕК;

- ауыр сыбайлас жемқорлық қылмыстық істер бойынша – 70 АЕК;

- аса ауыр сыбайлас жемқорлық қылмыстық істер бойынша – 100 АЕК.

Пара немесе келтірілген залал сомасы 1000 АЕК-тен асатын болса, біржолғы ақшалай сыйақы көрсетілген соманың 10 % құрайды, бірақ 4000 АЕК-тен аспайды.

Сыйақы сот үкімі шыққаннан кейін төленеді.

Айта кетейік, сыбайлас жемқорлық фактілерімен кездескен азаматтар 1424 немесе (7292) 319110 байланыс номеріне қоңырау шалу қажет.


Ұқсас жаңалықтар
Серіктестер жаңалықтары

Jańalyqtar