Маңғыстауда сирек кездесетін «СМА» ауруына шалдыққан бүлдіршінге салынған препарат оң нәтиже беріп жатыр

АҚТАУ.ҚазАқпарат - Маңғыстауда сирек кездесетін «СМА» ауруына шалдыққан бүлдіршіннің жағдайы жақсарып келеді. Баланың жұлынына 38 миллион теңге тұратын генетикалық препарат рет-ретімен енгізіліп жатыр, деп хабарлайды ҚазАқпарат тілшісі.

Медициналық көрсеткіш бойынша науқастың қимыл-қозғалысы артып келеді.

«СМА ауруына шалдыққан қыз балаға «Спинраза» атты гендік препаратты 3 рет жұлынға енгіздік. Бірінші инекциясы 21 желтоқсан күні салынды. Ал екіншісі 4 қаңтарда, үшіншісі 18 қаңтарда салынды. Енді 20 ақпанда төртіншісі енгізіледі. Бала ең алғаш келген кезде анасының көмегі арқылы отыратын еді. Бірінші препаратты салғаннан соң өздігінен отыра алатын болды. Қазір ол арқасын түзу ұстайды. Қолына қалам ұстап жазады, сурет те салады. Оның ұсақ моторикасы дамып келе жатыр, яғни оң өзгеріс бар, - дейді Маңғыстау облыстық көпбейінді балалар ауруханасының невропатолог дәрігері Мария Алдабергенова.

Емдік препаратты алу үшін Маңғыстау облыстық денсаулық сақтау басқармасы республикалық бюджеттен қаржы қарастырған.

«Бұл - тұқымқуалаушылық генетикалық ауру. Жұлынның алдыңғы жағында орналасқан қозғалыс нейрондарының болмауынан туындайды. Науқастың қимыл-қозғалысқа ешқандай әрекеті болмайды. Мұндай балалар отыра алмады. Жүре алмауынан бөлек, қимыл қозғалысы болмайды. Оларды тексеріп, зерттеп, тұрғылықты жері бойынша медико-генетикалық анализ алып, республикалық «Ана мен бала» орталығына жібереміз», - деді дәрігер.

Бүгінде облыс бойынша аталған сырқат түріне 4 бала шалдыққан.