Маңғыстауда кейінгі екі жылда қызылша ауруы тіркелмеді

АҚТАУ. ҚазАқпарат – Маңғыстау облысында 2021 жылдан бері қызылша ауруы тіркелмеген. Қазіргі таңда өңірде эпидемиологиялық жағдай тұрақты. Бұл туралы өңірлік санитариялық-эпидемиологиялық бақылау департаментінің басшысы Гүлнар Көркінбаева мәлім етті, деп хабарлайды ҚазАқпарат тілшісі.

Бүгінде еліміздің басқа аймақтарында індет өршуіне байланысты, өңірде қызылша ауруының алдын алу бойынша іс-шаралар белсенді жүргізіліп жатыр.

«Жұқпалы дерттен қорғанудың ең тиімді тәсілі – екпе. Сол арқылы ғана сырттан келген індеттен сақтана аламыз. Қазір облыста 8 420 доза екпе бар. Алдағы уақытта тағы әкелінеді деп жоспарланып отыр. Біз жыл басынан бері 1 жастан 17 жасқа дейінгі адамдардың екпесіне ревизия жүргіздік. Нәтижесінде 16 513 адамның вакцина алмағандығы анықталды», - деді Гүлнар Көркінбаева қоғамдық коммуникациялар орталығында өткен брифингіде.

Айта кетсек, Маңғыстау облысы аймағында соңғы рет 2020 жылы қызылшамен 361 адам ауырса, 2019 жылы 1 422 жағдай анықталған.