Маңғыстауда электр қуатының тарифі 17% төмендеді

АҚТАУ. ҚазАқпарат - Маңғыстау облысында қолданыстағы тарифтерді төмендету бойынша нақты шаралар қабылданды. Ағымдағы жылдың 1 қыркүйегінен бастап Ақтау қаласы бойынша электр тарифі 26% төмендеді,-деп хабарлайды ҚазАқпарат тілшісі.

Электр қуатын беру тарифінің төмендеуі 187 мың адамды қамтыды. Маңғыстау облысы әкімі баспасөз қызметінің мәліметінше, аймақ басшысы Ералы Тоғжанов бұл туралы Ақордада Елбасы Нұрсұлтан Назарбаевтың төрағалығымен өткен Қауіпсіздік Кеңесінің отырысында хабарлап, өңірдегі коммуналдық қызметтер тарифтері туралы баяндады.

Ағымдағы жылдың 1 шілдесінен бастап электр энергиясын өндіру тарифі 671,3 мың тұрғынды қамтумен 8% төмендеді. Екі энергия беруші компанияның электр энергиясын жеткізу схемасынан алып тастау арқылы Ақтау қаласының қала маңы бойынша тариф 5 мың адамды қамти отырып, 17% төмендеді. Нәтижесінде барлық облыс бойынша электр энергиясына тарифтің жалпы төмендеуі орта есеппен 17% құрады.

«Прокуратура органдары «МРЭК» АҚ үшін 8,4 млрд. теңге сомасына еңбекақы қоры мен қарыз сыйақысы шығындары бөлігінде электр қуаты тарифының негізсіз бекітілуі бойынша облыстық Монополияға қарсы департаментке қатысты талап арыз берді (еңбекақы төлемдері қоры 1,9 млрд. теңге және қарыз сыйақысы 6,5 млрд.теңге). Талап қанағаттандырылған жағдайда, облыстың барлық тұрғындары үшін тариф 20-30% төмендейді. 2018 жылға 1 кВт/сағ үшін 2,32 теңгеден 1,74 теңгеге дейін; 2019 жылға 2,49 теңгеден 2,06 теңгеге дейін; 2020 жылға 2,66 теңгеден 2,18 теңгеге дейін», - деді облыс әкімі Ералы Тоғжанов.

Бұдан басқа, Мемлекет басшысының тапсырмасына сәйкес барлық шағын Электржелілік компанияларды оңтайландыру бойынша жұмыстар жүргізілуде. Бұл электр энергиясының тарифін орташа есеппен 7% - ға 16,85 теңгеден 1 кВт/сағ үшін 15,74 теңгеге дейін төмендетуге мүмкіндік береді.

Сондай-ақ, «МЭБК» АҚ Электржелілік компаниясының алдына 9,2 млрд.теңге сомасына Электрмен жабдықтаудың жаңа желілерін салуды есепке ала отырып, инвестициялық бағдарламаны қабылдау міндеті қойылды.