Маңғыстау облысында кәсіпкерлік нысандар саны артты
Маңғыстау облысының кәсіпкерлік және сауда басқармасының басшысы Жанна Тоқбаеваның мәліметінше, биыл аймақта 54 мың кәсіпкерлік нысан жұмыс істеп тұр.
«Аймақтағы шағын және орта кәсіпкерліктің негізгі көрсеткіштері бойынша биылғы 1 қыркүйектегі жағдайға сәйкес, жұмыс істеп тұрған кәсіпкерлік субъектілердің саны өткен жылдың осы кезеңімен салыстырғанда 4,5%-ға өсті. Биыл барлығы 54 мың кәсіпкерлік нысан жұмыс істеп жатыр», - деді Жанна Тоқбаева.
Облыстағы 54 мың кәсіпкерлік нысанның 75,8%, яғни 40 890-ы жеке кәсіпкерлер үлесіне тиесілі. Ал шағын кәсіпорындар саны 18,9%, яғни 10 187 нысанды құрап отыр. Өңірдегі ауыл шаруашылығын дамытуда шаруа қожалықтарының 2 796-ы, яғни 5,2%-ы жұмыс істейді. Қалған 0,2% немесе 88 нысан орта кәсіпорындардың үлесіне тиесілі.
Спикердің айтуынша, жыл басынан бері өңірдегі шағын және орта бизнес нысандарының өндірген өнім көлемі 308,9 млрд. теңгені құрады.