Маңғыстау облысында бір адам газдан уланды
Дәрігерлер науқастың жағдайын орташа ауыр деп бағалап отыр. Бұл туралы «ҚазТрансГазАймақ» АҚ баспасөз қызметі мәлім етті.
Жетібай ауылының 66 жастағы тұрғынының газдан уланғаны туралы хабарлама, 6 сәуір күні сағат 09:15-те келіп түсті. Оқиға орнына газ саласы қызметінен басқа төтенше жағдайлар бөлімінің, полиция қызметкерлері, Қарақия ауданы әкімдігінің өкілдері келді. Зардап шеккен азаматша ауруханаға жатқызылды.
«Оқиға орнында авариялық бригада зардап шегушінің уақытша сарайда тұрып, үй-жайды жылыту үшін газ плитасының пешін қосқанын анықтады. Алдын-ала мәліметтер бойынша, сарайда жылыту жабдықтары мен қазандық орнатылмағандықтан адам уланған. Бұл учаскеде техникалық қызмет көрсету 2021 жылдың ақпан айында жүргізілді»,-деп хабарлады компанияның баспасөз қызметі.