МӘМС: Тұрғындар 2020 жылға дейін сақтандыру жүйесіндегі статусын анықтаулары тиіс

НҰР-СҰЛТАН. ҚазАқпарат - Медициналық сақтандыру қоры тұрғындардың сақтандыру жүйесіндегі мәртебесін анықтауға мүмкіндік беретін арнайы жобаны іске қосты. Аталған плагин арқылы кез келген азамат сақтандыру жүйесіндегі мәртебесін анықтай алады, деп хабарлайды «Әлеуметтік медициналық сақтандыру қоры» коммерциялық емес акционерлік қоғамының Алматы филиалы.

«Статусты анықтау үшін азаматтар www.fms.kz сайтына кіріп, ЖСН енгізуі қажет. Нәтижесінде әркім өзінің сақтандырылған-сақтандырылмағанын біле алады. Сонымен қатар, жүйе арқылы азаматтар жұмыс берушілер аударып жатқан төлемдер жайында да толық мәлімет ала алады. Жобаның басты мақсаты – халықтың уақытын үнемдеп, сұранысқа сай жүйені барынша ыңғайландыру», - делінген баспасөз баянында.

Еске сала кетейік, 2020 жылдың 1 қаңтарынан бастап Қазақстанда МӘМС жүйесі басталады.

«Осы уақытқа дейін тұрғындар тегістей дерлік сақтандыру жүйесіндегі статусын анықтап алуы керек. Сақтандырылмаған азаматтар кепілдендірілген тегін медициналық көмек пакетіне енген қызметтерді пайдалана алады. Ал, МӘМС пакетіне енген медициналық көмек түрлері сақтандырылған азаматтарға ғана көрсетіледі», - делінген хабарламада.

Әзірлеушілердің пікірінше, әмбебап жүйені алдағы уақытта барлық интернет-русурстар арқылы пайдалануға мүмкіндік тумақ. Ол үшін қызығушылық танытқан сайт иелері плагинды орнатуы тиіс.