МӘМС: Атырау облысында 563 мың тұрғын сақтандырылған

АТЫРАУ. ҚазАқпарат – Атырау облысында 563 мың тұрғын міндетті әлеуметтік медициналық сақтандыру жүйесімен қамтылған, деп хабарлайды ҚазАқпарат.

«Әлеуметтік медициналық сақтандыру қоры» КеАҚ Атырау облысы бойынша филиалының директоры Сәбит Құралбектің мәліметінше, Атырау облысының тұрғындарының 563 мыңы (85,8%) медициналық сақтандыру жүйесіне енгізілген.

«Алайда, облыста сақтандырылмаған тұрғындардың саны 93 571 адамды құрап отыр. Бұл – өңір тұрғындарының 14,2 проценті» -дейді Сәбит Құралбек.

Оның айтуынша, Атырау облысында медициналық сақтандыру жарнасының жалпы сомасы 30 млрд 372 млн теңгені құрап отыр. Оның ішінде 25 млрд 180 млн теңге (шамамен 96,4%) жұмыс берушілердің аударымы арқылы түскен. Ал, 5 млрд 191 млн теңге (3,6% жуығы) – жеке кәсіпкерлер мен азаматтық-құқықтық келісімшарт негізінде еңбек ететін тұлғалардың аударымы.

Еске сала кетелік, бұдан бұрын Атырау облысында 82 мың адам медсақтандырудан өтпегенін хабарлаған едік.