Мақта егуді қысқарту керек - Өмірзақ Шөкеев

НҰР-СҰЛТАН - ТҮРКІСТАН. ҚазАқпарат – Түркістан облысының әкімі Өмірзақ Шөкеев мақта бағасының арзандығы туралы шаруалар шағымына пікір білдірді, деп хабарлайды ҚазАқпарат тілшісі.

Әкімге мақташы қауымның жаз бойы бейнеттенген өнімінің әр келісі 150 теңгеден зауытқа сатылатыны туралы сұрақ қойылды.

«Биыл мақтаның нарықтағы бағасы төмен. Мақта өңдейтін зауыттар өнімнің әр тоннасына 120 мың теңге төлейміз деп айтқан болатын. Біз араласып, 150 мың теңгеге көтердік. Одан әрі көтеру мүмкіндігі жоқ. Жалпы, мақта туралы талай атып келе жатырмын. Мақта егуді қысқарту керек. Өйткені өте тиімсіз дақыл боп тұр қазір. Оның орнына көкөніс, бау-бақшаны көбейтуіміз керек. Оны қалай жасау керектігін үйрету үшін қайта-қайта семинар өткізіп жатырмыз. Келесі жылы бұл жағынан бетбұрыс болады деп ойлаймын», – деді облыс әкімі Орталық коммуникациялар қызметінде өткен баспасөз мәслихатында.