Мәдина Әбілқасымова елден капиталды негізсіз шығаруды шектеу іс-шараларын атады
2022 жылғы 12 қаңтар 11:48

Мәдина Әбілқасымова елден капиталды негізсіз шығаруды шектеу іс-шараларын атады

НҰР-СҰЛТАН. ҚазАқпарат – Бүгін Үкімет отырысында ҚР Қаржы нарығын реттеу және дамыту Мәдина Әбілқасымова елден капиталды негізсіз шығаруды шектеу іс-шараларын атады, деп хабарлайды ҚазАқпарат тілшісі.

«Мемлекет басшысының елден капиталды негізсіз шығаруды шектеу жөніндегі тапсырмасын іске асыру үшін агенттік Ұлттық банкпен және Қаржылық мониторинг агенттігімен бірлесіп, осы жылғы 10 қаңтарда трансшекаралық қаржылық операцияларды жүргізуге бақылау іс-шараларын күшейту туралы бірлескен бұйрықты қабылдады», - деді агенттік төрағасы.

Ол күдікті трансшекаралық операциялар тізбесі, сондай-ақ клиенттерді тиісінше тексерудің күшейтілген іс-шаралары бойынша қаржылық мониторинг субъектілерінің іс-қимыл тәртібі белгіленгенін атап өтті.

«Агенттік аталған бұйрық аясында банктердің клиенттерді тиісінше тексеру жөніндегі күшейтілген іс-шараларды сақтауын бақылайды. Сондай-ақ банк клиенттерінің ірі трансшекаралық операцияларына елден капиталды заңсыз шығару белгілерінің болуы тұрғысынан күнделікті мониторинг жүргізетін болады», - деді Мәдина Әбілқасымова.

Айта кетейік, Мемлекет басшысы Парламент Мәжілісінің жалпы отырысында жекелеген-қаржы өнеркәсіптік топтардың төтенше жағдайды пайдаланып, қаржыны шетелге шығару тәуекелі артып тұрғанын жеткізген болатын.


Jańalyqtar

MURAǴAT