Леңгірде оқушылардың жаппай улану оқиғасы бойынша тексеру басталды

ТӨЛЕБИ. ҚазАқпарат – Түркістан облысы Ленгір қаласында мектеп оқушылары мен ұстаздардың жаппай улану оқиғасы бойынша тексеру шаралары басталды. Бұл туралы облыстық полиция департаменті мәлімет таратты, деп хабарлайды ҚазАқпарат тілшісі.

Полицияның хабарлауынша, аталған жайт бойынша Төлеби АПБ-не тіркеуге алынған. Қазіргі таңда тиісті тексерулер жүргізілуде. Тәртіп сақшылары болған жайттың егжей-тегжейін анықтау үстінде. Алдын ала анықталғандай, 10-сынып оқушысы өзімен бірге мектепке газ балонына ұқсас затты алып келген. Өзінің айтуынша, оны көшеден тауып алған.
«Оқушы қыз аталмыш затты қызығушылықпен білім ордасының ішіне шашқан. Салдарынан 30-ға жуық оқушы өздерін жайсыз сезініп, ауруханаға жеткізілген. Оқушылардың барлығына медициналық көмек көрсетілді. Оның ішінде 8 оқушы дәрігердің бақылауында болса, қалғаны үйіне қайтарылды» делінген хабарламада.
Айта кетейік, бұған дейін Леңгір қаласындағы мектепте оқушылар, мұғалімдер және техникалық қызметкерлердің жаппай иістен уланып, ауруханаға түскенін хабарлаған болатынбыз.