Қызылордада жол апатынан зардап шеккен 6 адам ауруханаға жеткізілді
«Батыс Қытай - Батыс Еуропа» тасжолының Шиелі ауданы аумағындағы бөлігінде белгісіз адамдар жолдың жүріс бөлігіндегі темір қоршауды өз бетінше ашып тастаған. Бұл жол-көлік оқиғасының болуына алып келді.
Оқиға 11 маусымда Шиелі ауданындағы R-10 каналы тұсында болған. Сол аумақта жеңіл және жүк көлігі соқтығысты.
Салдарынан жеңіл автокөлікте келе жатқан 6 адам медициналық мекемеге жеткізілді. Қайтыс болғандар жоқ.
«Жүк көлігінің жүргізушісіне қатысты ҚР Әкімшілік құқық бұзу кодексі 610-бабының 2-бөлігіне сәйкес құжаттар жинақталуда. Жол-көлік оқиғасының себептері анықталып жатыр. Сондай-ақ, жолдың жүріс бөлігіндегі темір қоршауды өз бетінше ашу дерегі бойынша кінәлі адамдарды анықтау мақсатында жан-жақты тексеру жұмысы басталды. Жол апатына қатысты 2 автокөлік айып тұрағына жеткізілді» деп мәлім етті Қызылорда облыстық полиция департаментінен.
Ведомство мәліметінше, жеңіл автокөліктің жүргізушісіне қатысты ҚР Әкімшілік құқық бұзу кодексінің 593-бабы 1-бөлігіне сәйкес құжат жиналып жатыр.
Онда жолаушы және жүк тасымалдау қағидаларын сақтамау жағдайы көрсетілген.
Еске салсақ, бұдан бұрын Қызылордада көшеде мылтық алып жүрген тұрғын қолға түсті.
