Қызылордада мал іздеуге шыққан қарияның денесі арықтан табылды

ҚЫЗЫЛОРДА. ҚазАқпарат – Қызылорда облысында мал іздеуге шыққан 72 жастағы азаматтың денесі екі күннен кейін ауыл маңындағы каналдан табылды, деп хабарлайды ҚазАқпарат тілшісі.

1950 жылғы азамат Жалағаш ауданы Мәдениет ауылы маңындағы фазенда аумағынан 9 тамызда мал іздеуге шыққан. Содан із-түзсіз кеткен.

«Осыған байланысты Жалағаш ауданы Мәдениет ауылынан 4 шақырым жерде іздеу жұмыстары басталды. Оған облыстық төтенше жағдайлар департаментінің жедел құтқару жасағы, төтенше жағдайлар департаменті мамандары қатысты. Сондай-ақ, іздестіру шарасына аудандық полиция бөлімі қызметкерлері, туыстары, жергілікті тұрғындар атсалысты. 11 тамызда сағат 10:05-те ауыл аумағындағы «Мәдениет» суару каналында төмен ағысқа қарай аталған азаматтың мәйіті табылып, судан шығарылды», - деп мәлім етті Қызылорда облыстық төтенше жағдайлар департаментінен.

Ведомство мамандары тұрғындардан су айдындары маңында сақтық ережесін сақтауды сұрайды.

Еске салсақ, бұдан бұрын Қызылордада жол бойында көлік өртеніп, газ баллоны жарылғанын жазғанбыз.