Қызылордада көпірден Сырдарияға секірген жасөспірім қыз құтқарылды
14:20, 26 Сәуір 2022
ҚЫЗЫЛОРДА. ҚазАқпарат - Қызылорда қаласында Сырдария өзені үстіндегі көпірден суға секірген жасөспірім қыз құтқарылды, деп хабарлайды ҚазАқпарат тілшісі.
Оқиға 25 сәуірде жергілікті уақыт 18.00 шамасында болған. Облыстық төтенше жағдайлар департаментіне Ғ. Мұратбаев көшесі бойындағы Сырдария өзені үстінен сол жағалауға өтетін көпірдің үстінен жасөспірім қыздың суға секіріп кеткені жөнінде хабардама түсті.
«Оқиға орнына жедел құтқару жасағынан 4 құтқарушы 1 техникамен жетті. Құтқарушылар 2008 жылғы жасөспірім қызды сол жерде байқаған адамдардың жағаға шығарғанын анықтады. Одан кейін жасөспірім қызды зембілге салып, жедел жәрдем қызметінің мамандарына тапсырды», - деп жазылған департамент таратқан хабарламада.
Еске салсақ, бұдан бұрын Жаңақорғанда қатты жел 5 ғимараттың шатырын ұшырып әкетті .